Vísindamenn sáu fyrst í hvað stefndi átta klukkustundum áður en loftsteinninn, sem fékk nafnið 2024 RW1, kom inn í lofthjúpinn. Þar sem ekki var um ýkja stóran stein að ræða var engin hætta á ferðum, en staðreyndin er samt sem áður sú að þarna úti eru loftsteinar sem hætta gæti stafað af.
Myndband af 2024 RW1:
Fyrir 66 milljónum ára rakst loftsteinn á jörðina á Yucatán-skaga þar sem nú er Mexíkó og skildi eftir sig slóð eyðileggingar. Talið er að þessi loftsteinn, eða halastjarna (smástirni) sem var 9,65 kílómetrar í þvermál, sé meginástæða þess að risaeðlurnar dóu út. Minni loftsteinar hafa einnig valdið óskunda, til dæmis árið 2013 þegar einn slíkur komst til jarðar í Rússlandi. Höggbylgjan olli skemmdum á 7.300 húsum og tæplega 1.500 manns þurftu að leita sér aðhlynningar á sjúkrahúsi.
Geimferðarstofnanir eins og NASA og ESA fylgjast vel með því sem er að gerast fyrir ofan okkur og telja sig hafa ágæta mynd af loftsteinum sem geta ógnað okkur.
Þannig er til sérstakur skali, sem kallast Tórínó-skalinn, sem flokkar loftsteina í einskonar áhættuhópa. Ef loftsteinn fær einkunnina 0 er engin hætta á að hann lendi í árekstri við jörðina en ef hann fær 10 er öruggt að hann lendi í árekstri með skelfilegum afleiðingum. Ef einhver er farinn að ókyrrast skal tekið fram að enginn loftsteinn er með hærri einkunn en 1 á skalanum.
Mail Online hefur tekið saman sex loftsteina eða smástirni sem gætu lent í árekstri við jörðina þó líkurnar séu ef til vill hverfandi.
Þvermál: 479 metrar
Líkur á árekstri: 1/2.700 þann 24. september 2182
Vísindamenn uppgötvuðu þennan loftstein árið 1999 en hann er engin smásmíði, eða 67 milljón tonn og 200 sinnum þyngri en Empire State-byggingin. Það eru sem betur fer ekki mjög miklar líkur á árekstri og ef það gerist verður það ekki í okkar líftíma. Áreksturinn yrði samt harður og myndi krafturinn jafngilda því ef sprengd yrðu 1,4 milljarðar tonna af sprengiefninu TNT.
Þvermál: 1.999 metrar
Líkur á árekstri: 1/34.500 þann 16. mars 2880
Þetta er stærsti loftsteinninn á listanum og hann vegur hvorki meira né minna en 71 milljón tonn. Eins og sést hér að ofan eru líkur á árekstri sem betur fer litlar en ef svo ólíklega vill til að hann lendi á jörðinni yrðu afleiðingarnar skelfilegar, sennilega svipaðar og þegar risaeðlurnar dóu út. Árekstur myndi leysa úr læðingi orku sem jafngildir 75 milljörðum tonna af TNT.
Þvermál: 330 metrar
Líkur á árekstri: 1/181.000 þann 10. október 2119
Annar loftsteinn sem gæti haft skelfilegar afleiðingar, en hann vegur 43 milljónir tonna. Til að setja það í samhengi jafngildir það 4.500 Eiffel-turnum og myndi krafturinn jafngilda 150 Tsar-kjarnorkusprengjum sem Sovétmenn þróuðu fyrir margt löngu. Tsar-sprengjan, stundum kölluð Keisarasprengjan, er stærsta sprengja sem hefur verið sprengd.
Þvermál: 659 metrar
Líkur á árekstri: 1/11,5 milljónir þann 5. október 2024
Þetta er sá loftsteinn sem er skemmst frá okkur í tíma, ef svo má segja. Stærðfræðilega gæti hann lent í árekstri við jörðina eftir tæpan mánuð en líkurnar eru litlar sem engar. Og þó. Líkurnar á að vinna fyrsta vinning í Euro Jackpot eru 1 á móti 139 milljónum en það er fullt af fólki sem kaupir sér miða í hverri viku. Árið 2030 eru aftur líkur á árestri en þá eru þær um 1/10.000.000.
Þvermál: 50 metrar
Líkur á árekstri: 1/1.584 þann 14. febrúar 2046
Valentínusarloftsteinninn er hann kallaður og hann gæti sett áform elskenda í uppnám árið 2046 ef illa fer. Líkurnar á árekstri eru óþægilega miklar miðað við það sem gengur og gerist en sem betur fer er loftsteinninn ekki mjög stór. Telja vísindamenn að afleiðingarnar hugsanlegs áreksturs yrðu svipaðar og í Chelyabinsk árið 2013 – að því gefnu að hann lendi á tiltölulega heppilegum stað.
Þvermál: 659 metrar
Líkur á árekstri: 1/1,8 milljónum þann 14. desember 2113
Hér er á ferðinni býsna stór loftsteinn sem gæti auðveldlega lagt heila stórborg í rúst. Hann er talinn vega 49 milljón tonn en eins og nafnið gefur til kynna var hann fyrst uppgötvaður árið 1979. Ekki löngu eftir að hann var uppgötvaður misstu vísindamenn sjónar á honum og vita þeir í raun ekki mikið um stefnu hans. Útreikningar um hugsanlegan árekstur eru því byggðir á gömlum gögnum.
