Aston Villa var nokkrum klukkutímum frá því að brjóta PSR reglur ensku úrvalsdeildarinnar sem hefði kostað liðið tíu stig.

Þannig var bókhaldið hjá Aston Villa ekki gott eftir síðasta tímabil þar sem liðið náði sæti í Meistaradeild Evrópu.

Á meðan liðið fagnaði góðum árangri vissu stjórnendur félagsins að þeir þyrftu að sækja 40 milljónir punda inn í reksturinn til að standast PSR reglurnar.

Reglurnar snúa að því að félög séu ekki rekin með of miklu tapi. Var Villa búið að spenna bogann og þurfti að selja.

Svo fór að Douglas Luiz var seldur til Juventus fyrir um 40 milljónir punda áður en fjárhagsárið lokaði þann 30 júní.

„Við vorum í þeirri stöðu að við urðum að ná inn miklum tekjum til að brjóta ekki PRS reglurnar. Þetta var áskorun,“ sagði Damian Vidagany stjórnarmaður hjá Villa.

„Það voru allir að fagna sæti í Meistaradeildinni en ég var í gleðskapnum að hugsa um stigin sem gætu verið tekin af okkur. Við vorum ekki með mikinn tíma til stefnu.“