Lögreglu barst í dag tilkynning um að tveir aðilar hefðu verið stungnir í gistiskýlinu á Granda. Gerendur voru sagðir tveir og voru varnir að vettvangi þegar samband var haft við lögreglu. Þetta kemur fram í tilkynningu frá lögreglu.
Þegar lögregla kom á vettvang kom í ljós að ekki var um alvarlega áverka að ræða en annar árásarþoli fór á slysadeild til frekari aðhlynningar. Eins komu upplýsingar frá árásarþola að annar hefði verið rændur í leiðinni.
Skömmu síðar hafði vegfarandi samband við lögreglu og tilkynnti grunsamlega hegðun stutt frá vettvangi. Maður sem passaði við lýsingu af geranda var þar að fela sig undir bifreið. Lögregla handtók manninn og er hann nú vistaður í fangageymslu.
Lögreglan greinir frá fleiri málum í tilkynningu. Aðila var sleppt úr fangageymslu í morgun, en hann hafði verið þar vistaður í nótt. Hann var svo aftur handtekinn í dag eftir að hann veittist að starfsmanni íbúðarkjarna. Hann komst undan lögreglu en sneri til baka nokkru síðar og reyndi að brjóta sér leið inn. Lögregla stóð hann að verki og handtók hann og færði aftur í fangageymslu.
Eins barst tilkynning um aðila sem hafði verið til vandræða á bar í miðbænum og veist að starfsmanni. Sá var farinn þegar lögreglu bar að garði.