Armando Broja, framherji Chelsea, fer ekki til Ipswich eftir allt saman þar sem meiðsli komu í ljós í læknisskoðun þar.
Félögin höfðu náð saman um að Albaninn færi á láni til nýliðanna í ensku úrvalsdeildinni og að þeir myndu kaupa hann á 30 milljónir punda ef þeir halda sér í deildinni í vor. Leikmaðurinn hafði einnig samþykkt tilboð félagsins.
Nú verður hins vegar ekkert af skiptunum til Ipswich eftir að Broja féll á læknisskoðuninni.
Félagaskiptaglugganum verður skellt í lás í kvöld og spurning hvort það takist að finna nýjan áfangastað fyrir Broja.
