En þar með er ekki allt upptalið því í lok júlí voru að minnsta kosti 84 rússneskir málaliðar drepnir í fyrirsát í Malí. Nú hefur herforingjastjórnin í Malí snúið sér til öryggisráðs Sameinuðu þjóðanna vegna málsins og heldur því fram að Úkraínumenn hafi komið að málinu.
Úkraínsk stjórnvöld neita þessum ásökunum en þær geta í versta falli skaðað viðleitni þeirra til að afla sér stuðnings í Afríku.
En ef þetta er rétt, þá hafa Úkraínumenn með mikilli leynd opnað enn einar vígstöðvarnar í átökunum við Rússland, nú í Afríku.
Jótlandspósturinn segir að fyrir um ári hafi úkraínskir drónar og liðsmenn úrvalssveita hersins dúkkað upp í Súdan. Þar tóku þeir þátt í baráttunni við uppreisnarsveitir sem sóttu að höfuðborg landsins. Liðsmenn rússneska málaliðafyrirtækisins Wagner voru í slagtogi við uppreisnarsveitirnar.
Herforingjastjórnin í Malí heldur því fram að úkraínskir hermenn hafi verið á hliðarlínunni þegar allt að 1.000 stríðsmenn úr Tuareg ættbálknum og aðrir uppreisnarmenn, þar á meðal íslamskir öfgamenn, sátu fyrir bílalest hersins. Stjórnarhermenn og mikill fjöldi málaliða frá Wagner voru í bílalestinni.
Úr þessu varð bardagi sem stóð í nokkra daga. Tölur um mannfall eru óljósar en Tuaregmenn segja að minnst 84 Rússar, þar á meðal sá hæst setti úr þeirra röðum, hafi fallið. Þess utan hafi 47 stjórnarhermenn fallið.
15 Rússar eru sagðir hafa verið teknir til fanga og einnig náðu uppreisnarsveitirnar miklu magni vopna og hergagna á sitt vald.