Réttarhöld eru hafin í málinu í höfuðborginni Kinsasa en alls er farið fram á dauðarefsingu yfir 50 einstaklingum. Innocent Radjabu, saksóknari hersins, fór fram á þetta í gærmorgun en réttarhöld í málinu hafa staðið yfir síðan í júnímánuði. Farið er fram á dauðarefsingu yfir öllum hina grunuðu að einum undanskildum sem sagður er glíma við „sálræn“ veikindi.
Umrædd valdaránstilraun fór fram í maí síðastliðnum og fór stjórnarandstæðingurinn Christian Malanga fyrir henni. Alls létust sex manns í átökum sem brutust út í kjölfarið en Malanga var skotinn til bana af liðsmönnum hersins. Sonur hans, Marcel, er í hópi hinna ákærðu en hann fæddist í Utah í Bandaríkjunum. Hinir bandarísku ríkisborgararnir heita Benjamin Reuben Zalman–Polun og Tyler Thompson.
Stjúpmóðir Tylers, Miranda Thompson, lýsti því í samtali við bandaríska fjölmiðla, eftir að valdaránstilraunin fór út um þúfur, að hún hefði ekki hugmynd um það hvernig hann gat flækst í málið. „Þetta er algjörlega úr karakter og við erum sannfærð um að hann hafi ekki farið til Afríku til að taka þátt í einhverjum pólitískum aktívisma.“
Tyler og Marcel þessi voru félagar og spiluðu meðal annars fótbolta saman í úthverfi Salt Lake City á þeirra yngri árum. Marcel er sagður hafa boðið Tyler og fleiri gömlum félögum í heimsókn til Kongó en Tyler var sá eini sem þáði boðið.
Allir Bandaríkjamennirnir sem eru fyrir dómi hafa neitað að hafa lagt á ráðin um valdarán. Segir Marcel, sonur uppreisnarleiðtogans Christians Malanga, að faðir hans hafi hótað að drepa þá ef þeir gerðu ekki það sem hann bað þá um. Varð það til þess að þeir fóru með í ferðina örlagaríku að forsetahöllinni þar sem þeir voru að lokum handteknir.