„Við tökum þetta mjög alvarlega og höfum á grunni núverandi stöðu beint sjónum okkar í ríkari mæli að þessari ógn, því það er ekki hægt að ganga út frá að þetta geti ekki gerst á danskri jörð,“ sagði leyniþjónusta dönsku lögreglunnar, PET, í svari við fyrirspurn TV2 um málið.
PET sagði að það sem af er ári hafi verið mörg dæmi um að aðilar, sem tengjast Rússlandi, hafi komið að skemmdarverkum víða um Evrópu. Þarna hafi til dæmis verið um íkveikjur að ræða og gróf skemmdarverk sem hafi miðað að því að koma í veg fyrir að fólk geti fengið nauðsynjar og til að draga úr stuðningnum við Úkraínu og valda ótta í vestrænum samfélögum um að stríðið í Úkraínu geti harðnað enn frekar.
PET metur stöðuna sem svo að Rússar séu reiðubúnir til að taka meiri áhættu en áður þegar kemur að blendingshernaði gegn Evrópuríkjum og í Evrópu.
Talsmaður sænsku öryggislögreglunnar Säpo sagði í samtali við Aftonbladet að það sé nýtt að Rússar reyni að ráða afbrotamenn til að fremja skemmdarverk og grafa undan stöðugleika í NATÓ-ríkjunum, þar á meðal á Norðurlöndunum. Hann sagði að áður hafi sést að glæpagengi hafi verið notuð sem milliliðir í aðgerðum af þessu tagi en þó ekki á Norðurlöndunum.
Yfirmaður norsku leyniþjónustunnar, PST, sagði að verið sé að rannsaka „mörg atvik“ og að leyniþjónustan viti að rússneska leyniþjónustan noti innlenda afbrotamenn.
Talsmenn leyniþjónustustofnanna fóru ekki nánar út í hvaða skotmörkum Rússar beini aðgerðum sínum að. Talsmaður PST sagði að þar á bæ væri vel fylgst með orkuinnviðum og verið sé að rannsaka nokkra atburði tengdum orkugeiranum.
Flemming Splidsboel, sérfræðingur hjá dönsku hugveitunni DIIS, sagði að möguleg skotmörk Rússa séu innviðir á borð margvíslega strengi, járnbrautarteina eða rafmagns- og vatnsdreifingarkerfi.
Meðal mála sem hafa komið upp á Norðurlöndunum eru skemmdir á jarðstrengjum á milli norska fastalandsins og Svalbarða og á Evenes flugvellinum í Nordland. Ekki er vitað hvort Rússar voru þarna að verki.
Í Svíþjóð hafa komið upp grunsamleg tilfelli þar sem járnbrautarlestir hafa farið af sporinu á milli norska hafnarbæjarins Narvik og sænska námubæjarins Kiruna. Sænska öryggislögreglan telur að Rússar hafi verið að verki.