Í tilefni af því að 30 ár eru liðin frá því að þáttaröðin um Vini, Friends, hóf göngu sína verða leikmunir úr þáttaröðinni boðnir upp á netuppboði. Aðdáendum þáttanna gefst því tækifæri til að eignast raunverulega leikmuni og fatnað úr þáttunum.
Netuppboðið verður haldið 23. september en aðdáendur geta nú þegar boðið í suma af mununum. Daily Mail skýrir frá þessu.
Það er uppboðshúsið Julien‘s Auctions í Los Angeles sem sér um uppboðið.
„Á hverjum degi rennur Friends yfir skjá einhvers staðar í heiminum. Það sýnir hversu gríðarlega vinsælir þættirnir eru og þeir laða enn nýja aðdáendur að sér löngu eftir að síðasti þátturinn var sýndur,“ sagði David Goodman, forstjóri uppboðshússins.
Meðal þess sem hægt er að bjóða í er fatnaður, sem aðalleikararnir klæddust. Búningar sem Bruce Willis og Susan Sarandon klæddust. Einnig verða eftirlíkingar af upprunalegum leikmunum boðnar upp.
Meðal eftirlíkinganna er appelsínuguli sófinn úr Central Perk kaffihúsinu. Það er nú þegar búið að opna fyrir boð í hann og var hæsta boðið komið í 500 dollara í gær.