Vegurinn um Almenninga í austanverðum Skagafirði er gríðarlega illa farinn eftir landsig. Hann hefur verið lokaður fyrir bílaumferð en enn er hægt að fara um hann á hjóli.
Halldór Gunnar Hálfdánarson, bóndi á Molastöðum í Fljótum, þekkir veginn og svæðið betur en flestir aðrir. Hann tók myndir sem sýna hversu illa farinn vegurinn er.
„Í gær fór ég hjólandi um Almenninga en vegurinn hefur verið lokaður síðan um síðustu helgi vegna jarðsigs og skriðuhættu,“ segir Halldór Gunnar. „Það stóð hvergi að það mætti ekki hjóla um veginn en hann hefur orðið fyrir miklu tjóni í rigningu síðustu daga.“
Gert er ráð fyrir að vegurinn verði opnaður á miðvikudag. Hann hefur færst um fimm sentimetra á þremur dögum vegna rigninganna miklu.