Nvidia, sem framleiðir örflögur, varð í sumar verðmætasta fyrirtæki heims og hefur uppgangur fyrirtækisins á síðustu árum verið lygilegur. Örflögur fyrirtækisins nýtast í ýmislegt en það sem hefur keyrt þessa velgengi áfram er ör þróun á sviði gervigreindar.
Bloomberg birti í gær athyglisverða fréttaskýringu á vinnuumhverfinu innan veggja fyrirtækisins. Margir vinna langa vinnudaga og eru undir miklu álagi en þrátt fyrir það er starfsmannaveltan töluvert minni en gengur og gerist í heimi tæknifyrirtækja. Hún er um 2,7% hjá Nvidia en allt að 18 prósent hjá öðrum fyrirtækjum í svipuðum geira.
Í umfjöllun Bloomberg var rætt við núverandi og fyrrverandi starfsmenn sem vörpuðu ljósi á vinnuandann í fyrirtækinu og hvað það er sem heldur í fólk.
Einn fyrrverandi starfsmaður í markaðsdeild Nvidia lýsti því í samtali við Bloomberg að hún hefði stundum þurft að mæta á tíu fundi á hverjum degi þar sem voru samankomnir 30 starfsmenn. Á þessum fundum hefði gjarnan hart verið tekist á og mikið rifist en í lok dags séu það hin „gylltu handjárn“ sem haldi fólki í starfi.
Nvidia hefur nefnilega haft þann háttinn á að bjóða starfsmönnum kauprétt af hlutabréfum þar sem kveðið er á um að þeir geti ekki innleyst hagnaðinn fyrr en eftir fjögur ár hjá fyrirtækinu að jafnaði.
Frá árinu 2019 hefur hlutabréfaverð í Nvidia hækkað um 3.766% sem þýðir að þeir sem hafa unnið hjá fyrirtækinu í 4-5 ár eru líklega milljónamæringar í dag. Starfsmenn eru því margir hverjir tilbúnir að leggja ýmislegt á sig til að fá eignast feitan bankareikning fyrir nokkur ár hjá Nvidia.
Fyrrverandi verkfræðingur hjá Nvidia segir við Bloomberg að þeir sem hafa starfað hjá fyrirtækinu í tíu ár eða meira eigi líklega flestir meira en nóg í dag til að geta sest í helgan stein. Margir freistist þó til að taka nokkur ár í viðbót enda til mjög mikils að vinna.
Verkfræðingurinn fyrrverandi segist reglulega hafa heyrt í fólki á kaffistofum fyrirtækisins sem montaði sig af því að hafa keypt sér lúxusvillur til að gera sumarleyfin skemmtilegri. Þá hafi margir starfsmenn keypt sér rándýra miða á SuperBowl eða á úrslitakeppni NBA-deildarinnar í körfubolta. Þá bendir hann á að það sé gaman að kíkja á bílastæðið fyrir utan höfuðstöðvar fyrirtækisins þar sem sjá glæsikerrur eins og Porsche, Corvette og Lamborghini.
New York Post segir frá því að stofnandi Nvidia, Jensen Huang, hafi eitt sinn komið fram í viðtali við fréttaskýringaþáttinn 60 Minutes þar sem hann ræddi meðal annars um starfsmannamál fyrirtækisins. Sagðist hann leggja mjög hart að starfsfólki sínu. „Ef þú vilt gera ótrúlega hluti þá á það ekki að vera einfalt,“ sagði hann.
