Í gær greindum við frá því að Þórdís Björk Þorfinnsdóttir, leik- og söngkona og ein meðlima Reykjavíkurdætra, hefði gert góðlátlegt grín að peppi nágranna sinna í Reykjavíkurmaraþoni á laugardag.
Sjá einnig: Dísa íhugaði að flýja heimili sitt á laugardag – „Þetta er eins og að vera á skemmtistað í helvíti“
Dísa sem býr í Vesturbænum ásamt fjölskyldu sinni mátti þola það að nágrannar hennar spiluðu lag Siggu Beinteins Í larí lei stanslaust í nokkrar klukkustundir, allt auðvitað gert til að peppa hlauparana áfram. Dísa sagðist alveg vera til í annað lag, eða blöndu af nokkrum, og benti einnig á að flestir hlauparanna væru með heyrnartól og heyrðu því mögulega ekkert í þessu linnulausa peppi.
„Það byrjaði ekki þannig. Við vorum að spila mikið Bruce Springsteen en Guðgeir vinur minn var að fara hlaupa þarna fram hjá í 21 [km] og dóttir hans, Guðlaug Ylfa, litla frænka, bað mig um að spila Í larí lei fyrir hann. Þegar hann er að koma þá smellum við þessu á fóninn og það varð mikil breyting á stemningu hjá fólki sem var að hlaupa fram hjá,“ segir Ágúst Sverrir, nágranni Dísu, sem er sökudólgurinn.
„Ég vil biðja Þórdísi innilegrar afsökunar á þessu,“ segir Ágúst Sverrir í samtali við Ísland vaknar í morgun.
„Þannig að það var bara ákveðið þarna að setja það bara á „repeat“. Ég ætla ekki að segja að það hafi verið gott fyrir eyrun mín frekar en einhverra annarra en þeir sem voru að hlaupa fram hjá voru 15-20 sek. fram hjá okkur og þá væru þau bara farin þannig að við þurfum að halda þessu gangandi fyrir alla hina,“ segir Ágúst Sverrir.
Í þættinum bauð hann Siggu Beinteins formlega að vera með í peppinu á næsta ári.
Hlusta má á spjallið í heild sinni hér.
Hér sem hafa ekki hugmynd um hvaða lag er að ræða geta hlustað á það hér, mögulega á repeat í nokkrar klukkustundir.