Útvarpsmaðurinn Þórður Helgi Þórðarson, einnig þekktur sem Doddi litli, er nú í endurhæfingu eftir stóra skurðaðgerð sem hann gekkst undir um verslunarmannahelgina. Segist hann því ekki mæta til vinnu á næstunni.
„Á ekkert að mæta í vinnu aftur? Nei, ekki á næstunni.
Komið þið sæl, ég ætlaði ekkert að ræða þessi mál hér en vegna allra fyrirspurnanna um hvort ég ætli ekki að fara að mæta í útvarpið held ég að ég verði að segja ykkur aðeins af mínum málum,“ segir Doddi í færslu á Facebook.
„Um verslunarmannahelgina var gerð stór skurðaðgerð á mér vegna bráðrar ósæðarflysjunar við hjarta . Þetta er sjúkdómur þar sem 50% sjúklinga deyja áður en þau komast í aðgerð og 20% þeirra lifa aðgerðina ekki af.
Ég var einn af þeim heppnu og var að koma heim eftir legu á LSH í tæpar 3 vikur og vil ég þakka starfsfólki kærlega fyrir allt.
Nú tekur við endurhæfing í einhverja mánuði svo nei…. ég er ekki á leið í loftið alveg á næstunni. Ég þakka stuðninginn.“