Alfreð Finnbogason framherji KAS Eupen í Belgíu hefur ákveðið að hætta að gefa kost á sér í íslenska landsliðið. Framherjinn knái segir þetta erfiða ákvörðun.
Alfreð hefur verið stór hluti af islenska landsliðinu um langt skeið og var í hópnum sem fór á Evrópumótið og Heimsmeistaramótið.
Alfreð var í minna hlutverki árið 2016 á EM en árið 2018 var hann lykilmaður og skoraði fyrsta mark Íslands á HM þegar liðið gerði 1-1 jafntefli gegn Argentínu.
„Takk fyrir mig og þær frábæru minningar sem ég hef upplifað með íslenska landsliðinu síðustu 15 árin. Það er ótrúlega erfitt að kveðja eitthvað sem hefur verið svo stór hluti af lífi manns, en ég finn það að tíminn er réttur núna til að stíga til hliðar,“ segir Alfreð í færslu á Instagram.
„Allar gleðistundirnar munu lifa með mér að eilífu, þar sem hápunktarnir voru auðvita að fara á EM 2016 og HM 2018 með vinum mínum. Upplifanirnar og ógleymanlegu augnablikin eru svo mörg, alveg eins og erfiðu tímanir sem er allt hluti af ferlinu sem mér þykir mjög vænt um.“
Alfreð hefur verið í minna hlutverki eftir að Age Hareide tók við og þessi 35 ára framherji ákveður því að láta gott heita. „Það er ekkert sem hefur gert mig eins stoltan á ferlinum eins og að spila fyrir Ísland. Hjartans þakkir til allra þjálfara, starfsmanna og leikmanna sem hafa verið hluti af reisunni. Risa þakkir til stuðningsmanna íslenska landsliðsins fyrir stuðninginn og minningarnar saman út um allan heim!“
Alfreð lék 73 leiki fyrir hönd Íslands og skoraði í þeim átján mörk.
View this post on Instagram