Lögin voru samþykkt í síðustu viku og eru hluti af nýrri og harðri siðgæðislöggjöf. Hibatullah Akhundzada, sem er valdamesti Talibaninn, hefur samþykkt lögin. The Guardian skýrir frá þessu og segir að nýja löggjöfin nái yfir margt sem við kemur daglegu lífi, þar á meðal almenningssamgöngur, tónlist, rakstur og hátíðarhöld.
Í þrettándu grein laganna, sem snýr sérstaklega að konum, er þeim gert skylt að hylja líkama sinn öllum stundum þegar þær eru á almannafæri og lögð er áhersla á að það sé kjörið að hylja andlit sitt til að koma í veg fyrir að aðrir falli í freistni. Einnig er tekið fram að fatnaðurinn eigi ekki að vera of þunnur, þröngur eða stuttur.
Þess utan er konum nú bannað að syngja og lesa upphátt á almannafæri. Ástæðan er að kvenröddin er talin of æsandi. Konum er einnig bannað að horfa á karlmenn sem þær eru ekki skyldar blóðböndum eða giftar. Þetta gildir einnig fyrir karla, þeir mega ekki horfa á konur sem þeir eru ekki skyldir blóðböndum eða kvæntir.
Konum er nú einnig gert að hylja sig alveg þegar þær eru nærri þeim sem ekki eru múslimar. Þetta er gert til að koma í veg fyrir að þær verði spillingu að bráð.
