Benjamin Dowling lést 2019, 35 ára að aldri, eftir að hafa glímt við mikla fötlun af völdum heilablæðingar sem hann varð fyrir á heimili Terry McKirchy í Flórída 1984. Lengi vel töldu sérfræðingar að heilablæðingin væri afleiðing þess að hann hefði verið hristur harkalega. McKirchy, sem nú er 62 ára, þvertók fyrir að hafa unnið honum mein. Í kjölfar krufningar á Dowling 2021 kom í ljós að banamein hans voru áratuga gamlir áverkar. Sky News skýrir frá þessu.
Þegar niðurstaða krufningarinnar lá fyrir var McKirchy ákærð fyrir morð af fyrstu gráðu. Hún játaði sök fyrir dóm í síðustu viku eftir að hafa gert samkomulag við saksóknara en í því felst að hún játaði á sig manndráp. Hún var dæmd í þriggja ára fangelsi.
Benjamin fæddist í janúar 1984. Nokkrum mánuðum síðar var McKirchy, sem var 22 ára, ráðin til að gæta hans á heimili sínu í Fort Lauderdal á meðan foreldrar hans voru í vinnu. Þegar móðir hans sótti hann dag einn í byrjun júlí var líkami hans slappur og hnefarnir krepptir. Hún fór strax með hann á sjúkrahús og komust læknar að þeirri niðurstöðu að hann hefði fengið heilablæðingu eftir að hafa verið hristur harkalega.
McKirchy var handtekin nokkrum dögum síðar. Hún neitaði sök en sætti sig við að vera refsað. Þetta kom foreldrum Benjamin mjög á óvart því McKirchy var gengin sex mánuði með þriðja barn sitt og átti allt að 17 ára fangelsi yfir höfði sér. Hún var þó aðeins dæmd í nokkurra vikna fangelsi, eða þar til barnið kæmi í heiminn.
Hún hélt fram sakleysi sínu og sagði blaðamönnum að „hún væri með hreina samvisku“ en hefði gert samkomulag við saksóknara um að sætta sig við refsingu en neita sök því hún vildi ljúka málinu og vera með börnunum sínum tveimur.