Fjölmargir stuðningsmenn Chelsea voru bálreiðir á samskiptamiðlum í gær eftir myndband sem félagið birti opinberlega.
Þar var endurkoma Joao Felix tilkynnt en hann samdi við félagið frá Atletico Madrid og gerir sex ára samning.
Felix þekkir aðeins til Chelsea en hann spilaði stuttlega með liðinu á láni í fyrra en stóðst ekki allar væntingar.
Chelsea ákvað að kaupa Portúgalann endanlega í sumar og borgar yfir 40 milljónir punda fyrir hans þjónustu.
Chelsea notaðist við lagið ‘Homeciming’ sem samið var af Kanye West og talaði um ‘heimkomu’ Felix sem spilaði þarna í afskaplega stuttan tíma.
Það fór illa í marga stuðningsmenn liðsins sem í raun voru ekki að vonast eftir því að semja aftur við leikmanninn.
,,Að nota þetta lag í að kynna fyrrum lánsmann er nýr lágpunktur, að selja uppalinn leikmann fyrir það er sami lágpunktur,“ sagði einn netverji.
Þar er talað um sölu Conor Gallagher sem fór til Atletico Madrid á móti en hann er uppalinn hjá enska félaginu.
,,Það er ekki möguleiki að Chelsea sé að notast við þetta lag um leikmann sem spilaði hérna í hálft tímabil. Með því þá þvinga þeir leikmann burt sem hefur verið hér í sex ár. Fáránlegt,“ segir annar.
Hægt er að finna fjölmörg slæm skilaboð á samskiptamiðlum en vonandi fyrir Felix þá stenst hann væntingar í þetta sinn.