Thomas Lane, einn af fjórum lögreglumönnum sem dæmdir voru fyrir meðferðina sem leiddi til dauða George Floyd, hefur verið sleppt úr fangelsi. Hann afplánaði tvo dóma samtímis.
Lane var dæmdur fyrir að brjóta á borgararéttindum George Floyd þann 25. maí árið 2020 í borginni Minneapolis í Minnesota fylki. Tveir aðrir lögreglumenn, Tou Thao og J. Aleaxander Kueng, voru dæmdir fyrir það sama en sá fjórði, Derek Chauvin fékk dóm fyrir manndráp.
Morðið á George Floyd, sem hafði verið handtekinn fyrir að selja sígarettur á götuhorni og nota falsaðan 20 dollara seðil í kjörbúð, olli gríðarlegri reiði og mótmælaöldu í Bandaríkjunum og víðar. Samtökin Black Lives Matter hlutu alþjóðlega athygli í mótmælunum.
Thomas Lane, sem hélt fótum George Floyd á meðan hann var kæfður til dauða, var sá fyrsti til að vera dæmdur í málinu. Hann fékk tveggja og hálfs árs fangelsisdóm í júlí árið 2022 sem var jafn framt stysti dómurinn. Kueng fékk þriggja ára dóm, Thao þriggja og hálfs árs en Chauvin rúmlega 22 árs fangelsisdóm.
Blaðið People greinir frá því að Lane, sem er 41 árs gamall, hafi verið sleppt í gær, 20. ágúst, samkvæmt gögnum bandarísku fangelsismálastofnunarinnar.
Rétt eins og bæði Kueng og Thao sagði Lane fyrir rétti að hann hefði einungis verið að fylgja fyrirmælum Chauvin. Chauvin var sá lögreglumaður sem kæfði Floyd til dauða með því að setja hnéð á hálsinn á honum.
Seinna játaði Lane að hafa tekið þátt í manndrápi af gáleysi og hlaut hann þá þriggja ára dóm. Hins vegar fékk Lane að afplána dómana tvo samtímis og lauk fyrri fangelsisvistun fyrr á þessu ári. Lane afplánaði dómana í Englewood alríkisfangelsinu í bænum Littleton í Colorado fylki, nálægt borginni Denver.
Þó að Lane sé laus úr fangelsi þá þarf hann að tilkynna sig reglulega til fangelsisyfirvalda næsta árið, eða til 20. ágúst árið 2025. En afplánunarreglur í Minnesota gera ráð fyrir að fangar afpláni tvo þriðju dóma sinna innan veggja fangelsis og einn þriðja heima hjá sér undir eftirlit.
