Enginn þorir að slá því föstu hvað varð þess valdandi að átökin brutust út en Danska ríkisútvarpið segist hafa heimildir fyrir að þjófnaður á miklu magni fíkniefna, líklega hassi, hafi verið neistinn sem kveikti bálið. Eru aðilar, sem eru sagðir tengjast glæpagenginu LTF, sagðir hafa stolið fíkniefnunum.
Segist miðillinn hafa heimildir fyrir að lögreglan rannsaki málið út frá þeirri kenningu að aðilar tengdir LTF hafi stolið fíkniefnum frá öðru glæpagengi og að í stað þess að gengin kæmu sér saman um fjárhagslegar bætur hafi þau gripið til ofbeldis. LTF glæpagengið er bannað í Danmörku en eins og gefur að skilja þá skiptir það glæpamenn litlu sem engu máli, þeir halda sínu striki.
David Sausdal, lektor í afbrotafræði við háskólann í Lundi, sagði í samtali við Danska ríkisútvarpið að þetta mál sé klassískt dæmi um hvernig átök glæpagengja geti farið úr böndunum. Glæpagengin stundi viðskipti og ef aðrir steli markaðshlutdeild að því sem viðskiptin byggjast á, í þessu tilfelli fíkniefni, þá neyðist glæpagengin til að svara fyrir sig. Glæpagengin fari ekki með mál sín fyrir dóm, þau fari í stríð við önnur glæpagengi og noti ofbeldi til að leysa deilurnar.
Glæpagengið, sem fíkniefnunum var stolið frá, er að miklu leyti óþekkt en félagar í því eru aðallega sagðir vera Danir en gengið er einnig sagt eiga í nánu sambandi við sænska afbrotamenn. Leiðtogar þess eru sagðir halda sig erlendis og það sama gildir um leiðtoga LTF en meðlimir LTF eru aðallega af innflytjendaættum.