Þetta sagði breski hernaðarsérfræðingurinn Sean Bell í samtali við Sky News. Hann sagði að Pútín muni ekki fallast á neinar viðræður þar sem rætt verður um hertekin svæði, þrátt fyrir markmið Úkraínumanna þar um. Þess í stað muni hann takast á við málið af „miskunnarleysi“.
Hann sagði að núna hafi Pútín tvo kosti í stöðunni. Að gera það sem Úkraínumenn vilja helst að hann geri en það er að flytja hluta af bestu hersveitunum frá Donbas til Kúrsk eða þá að senda hersveitir frá landamærunum við Litáen og Krím til Kúrsk. Hann benti á að þessar hersveitir séu ekki bardagareyndar og muni ekki standast úkraínsku hersveitunum snúning.
Hvað varðar innrásina í Kúrsk sagði hann að Úkraínumenn hafi líklega ekki reiknað með að komast svona langt. Þeir hafi sent 1.000 hermenn af stað og líklega 20 skriðdreka. Síðan hafi þeir áttað sig á að það var nánast engin mótspyrna og á því hafi þeir grætt.
Bell sagði að Úkraínumenn hafi tvo valkosti í stöðunni: Annar er að reyna að halda hlutum af Kúrsk og eiga þá um leið á hættu að tapa þar. Hinn er að láta Pútín það eftir að giska á hvar við hin löngu rússnesku landamæri þeir muni láta til skara skríða næst og þvinga hann til að styrkja varnirnar á þeim en þannig geta þeir dregið úr styrk Rússa við fremstu víglínurnar í Úkraínu.
„Þetta virðist vera meistaralegt,“ sagði hann um innrás Úkraínumanna.
