Úkraínumenn eyðilögðu nýlega þrjár brýr yfir ána Seym í Kúrsk en þar sækja Úkraínumenn fram og leggja land undir sig. Brýrnar voru mjög mikilvægar fyrir rússneska herinn því þær voru notaðar til að flytja hergögn og aðrar nauðsynjar til hersveita.

BBC skýrir frá þessu og segir að þetta geti gert Rússum erfitt fyrir við stríðsreksturinn.

Rússneskir embættismenn segja að Úkraínumenn hafi einnig einangrað nokkur svæði í héraðinu frá restinni af því, sérstaklega nærri bænum Glushkova.

Volodymyr Zelenskyy, forseti Úkraínu, sagði um helgina að úkraínski herinn sé að styrkja stöðu sína í Kúrsk og að þau svæði sem nú séu á valdi Úkraínumanna geti orðið „skiptimynt“. Þarna á hann líklega við að Úkraínumenn hyggist nota þau til að semja við Rússa um að fá aftur úkraínsk landsvæði sem eru nú á valdi Rússa.