Angela Bacares, eiginkona breska milljarðamæringsins Mike Lynch, bíður nú frétta af eiginmanni sínum og átján ára dóttur eftir að snekkja sem fjölskyldan var í sökk rétt fyrir utan Sikiley í gærmorgun. Einn hefur fundist látinn og sex er enn saknað.

Angela tjáði sig um atvikið í viðtali við ítalska fjölmiðilinn La Republicca í gærkvöldi þar sem hún rifjaði upp hvað gerðist þegar snekkjan sökk snemma í gærmorgun þegar allir voru enn í fastasvefni.

Rannsókn á tildrögum slyssins stendur yfir en talið er víst að vatnsstrokkur af völdum hvirfilvinds hafi myndast og farið yfir snekkjuna með þeim afleiðingum að hún sökk. Snekkjan var með óvenju hátt mastur og var þar að auki við akkeri sem er talið hafa raskað jafnvægi hennar.

Angela segir að þau hjónin hafi vaknað klukkan fjögur í gærmorgun þegar snekkjan tók að halla skyndilega. Hún segir að þau hafi ekki verið mjög óttaslegin til að byrja með en hún engu að síður farið á fætur til að kanna málið frekar.

Í kjölfarið hafi frekari halli komið á snekkjuna með þeim afleiðingum að glös og annað lauslegt datt úr hillum. Örskömmu síðar var snekkjan farin á bólakaf og liggur hún nú á hafsbotni.

Angela var í hjólastól þegar rætt var við hana en hún skarst illa á fótum þegar hún reyndi að koma sér frá borði. Alls voru 22 um borð í snekkjunni og tókst 15 að koma sér um borð í björgunarbát.

Skipstjóri skipsins, James Calfield, sagði í gær að mastrið á snekkjunni hafi brotnað þegar vatnsstrokkurinn fór yfir snekkjuna og það hafi tekið hana skamman tíma að sökkva. „Við sáum þetta ekki fyrir,“ sagði hann.