Frankfurter Alggemeine Zeitung skýrir frá þessu og segir að engin ný útgjöld, tengd stuðningi við Úkraínu, verði heimiluð það sem eftir lifir árs og að framvegis verði stuðningur bundinn við rússneska fjármuni sem hafa verið frystir í Vestrænum bönkum. Vísar blaðið í bréf frá fjármálaráðherra landsins til varnarmálaráðherrans en það var sent í byrjun mánaðarins.
Þetta eru mjög slæm tíðindi fyrir Úkraínu því Þjóðverjar hafa lagt næst mest af mörkum til landsins, aðeins Bandaríkjamenn hafa lagt meira af mörkum. Þetta mun væntanlega hafa áhrif á vígvellinum og framleiðslu og kaup á skotfærum og drónum.
Úkraínumenn fá helmingi minna frá Þjóðverjum á næsta ári en þessu og 2026 verða framlögin aðeins tíu prósent þess sem þau eru á þessu ári.
Þessar fréttir koma á sama tíma og Úkraínumenn sækja fram í Kúrsk héraðinu í Rússlandi en þeir réðust mjög óvænt þar inn nýlega. Markmið þeirra með innrásinni er að þvinga Rússa til „réttlátra“ samningaviðræðna.
Á sama tíma sækja Rússar fram í Donetsk og leggja sífellt meira land undir sig.
Í gær sagði talsmaður þýsku ríkisstjórnarinnar að ekki verði dregið úr stuðningnum við Úkraínu, honum verði haldið áfram eins lengi og þörf krefur. Hann sagði rétt að ætlunin sé að fjármagna hluta stuðningsins með rússneskum fjármunum.