Launahæst er Sunneva Einarsdóttir, með yfir 1,2 milljónir á mánuði í laun að meðaltali miðað við greitt útsvar 2023. Launalægst er Brynhildur, með tæplega 50 þúsund krónur í mánaðarlaun.
Prófaðu að endurhlaða síðuna ef þú sérð ekki færsluna hér að neðan.
View this post on Instagram
Teboðið er í umsjón Sunnevu Einarsdóttur og Birtu Lífar Ólafsdóttur. Fyrsti þáttur fór í loftið fyrir þremur árum og hafa þær síðan stofnað áskrift fyrir hörðustu hlustendur.
Sunneva Einarsdóttir er einn vinsælasti áhrifavaldur landsins. Hún er með rúmlega 58 þúsund fylgjendur á Instagram og er reglulega í samstarfi með fyrirtækjum á borð við Nike, Nocco, Marc Inbane, Gina Tricot og Lancome.
Sunneva hefur reynt fyrir sér í sjónvarpi með góðum árangri. Hún hefur komið fram í tveimur raunveruleikaþáttum á Stöð 2, #Samstarf og LXS.
Miðað við greitt útsvar á síðasta ári má ætla að mánaðarlegar tekjur Sunnevu nemi 1.224.572 kr. á mánuði.
Hún hefur hækkað þó nokkuð í gegnum árin. Árið 2020 voru mánaðartekjur hennar um 190 þúsund krónur og árið 2021 voru þær rétt undir 540 þúsund krónur á mánuði. Árið 2022 voru þær 709.950 kr. á mánuði.
Birta Líf er markaðssérfræðingur og með um 16 þúsund fylgjendur á Instagram.
Hún hefur einnig verið í ýmsum samstörfum við fyrirtæki í gegnum árin, eins og Eleven Australia og gáfu þær vinkonurnar nýlega út ísinn Bestís í samstarfi við Kjörís.
Tekjur Birtu Lífar voru 357.364 kr. í fyrra miðað við greitt útsvar.
View this post on Instagram
Vinkonurnar Lína Birgitta Sigurðardóttir, athafnakona og áhrifavaldur, Gurrý Jónsdóttir, snyrtifræðingur og áhrifavaldur, og Sólrún Diego, áhrifavaldur og skipulags- og þrifsérfræðingur, halda úti hlaðvarpinu Spjallið.
Þær breyttu fyrirkomulagi þáttarins í október í fyrra og er nú hægt að kaupa áskrift.
Þrifglaði áhrifavaldurinn Sólrún Diego er ein vinsælasta samfélagsmiðlastjarna landsins og hefur haldið þeim titli í þó nokkur ár. Hún hefur skrifað tvær bækur um þrif og skipulag og þar að auki gefið út skipulagsdagbók.
Hún er með rúmlega 46 þúsund fylgjendur á Instagram, auglýsir ýmsar vörur á miðlinum og er reglulega í stærri samstörfum við ýmis fyrirtæki.
Hún gekk til liðs við markaðsteymi Kringlunnar fyrir ári síðan.
Mánaðarlaun hennar árið 2023 miðað við greitt útsvar voru 609.739 kr. Þau hækkuðu milli ára, en mánaðarlaun hennar voru 473.905 kr. að meðaltali árið 2022.
Lína Birgitta hefur rekið fatafyrirtækið Define The Line í árabil. Hún opnaði rými fyrir atvinnurekendur – „business pad“ – ásamt unnusta sínum, Gumma Kíró, árið 2022 en seldu það í febrúar í fyrra.
Miðað við greitt útsvar á síðasta ári má ætla að mánaðarlegar tekjur Línu Birgittu séu 485.813 kr.
Til samanburðar var hún með 356.204 kr í tekjur árið 2022 og 413.720 kr. í tekjur árið 2021.
Guðríður Jónsdóttir, betur þekkt sem Gurrý, er snyrtifræðingur, eigandi snyrtistofunnar Kopar og áhrifavaldur.
Hún var með 237.434 kr. í tekjur miðað við greitt útsvar 2023.
View this post on Instagram
Áhrifavaldarnir og vinkonurnar Brynhildur Gunnlaugsdóttir og Sara Jasmín Sigurðardóttir eru með hlaðvarpið Gellukast.
Brynhildur er mjög vinsæl, bæði hérlendis og erlendis. Hún er með yfir 1,6 milljónir fylgjenda á TikTok og 122 þúsund fylgjendur á Instagram. Hún stofnaði íþróttavörumerkið Áróra fyrir tæplega ári síðan.
Hún var með 49.469 kr. í mánaðarlaun að meðaltali í fyrra miðað við greitt útsvar 2023.
Sara Jasmín starfar sem markaðsstjóri samfélagsmiðla hjá heildsölunni Reykjavík Warehouse og nýtur einnig vinsælda á samfélagsmiðlum.
Hún var með 473.253 kr. í mánaðarlaun að meðaltali í fyrra miðað við greitt útsvar 2023.
Um er að ræða útsvar hvers og eins og eru mánaðarlaun reiknuð út frá því. Upphæðirnar þurfa því ekki að endurspegla föst laun viðkomandi og til að mynda er sleppt skattfrjálsum dagpeningum, bílastyrkjum og greiðslum í lífeyrissjóði. Gögnin eru opinber fyrir fjölmiðla hjá Skattinum þessa dagana.
