Rússneski tölvuþrjótahópurinn Fighting Ursa hefur á snjallan hátt nýtt sér auglýsingar fyrir rándýra Audi bíla til að blekkja háttsetta aðila til að ýta á hlekki sem eru í meira lagi vafasamir og eiginlega bara hættulegir hvað varðar tölvuöryggi.

Það er svo sem ekki oft tilefni til að hrósa rússneskum tölvuþrjótum en það verður nú samt sem áður að taka hattinn ofan fyrir hugmyndaauðgi þeirra þegar kemur að því að blekkja fólk.

Í nýrri rannsókn frá tölvuöryggisfyrirtækinu Palo Alto Network kemur fram Fighting Ursa hafi nýtt sér auglýsingar fyrir Audi bíla til fá háttsett fólk, sérstaklega diplómata, til að ýta á tengil sem inniheldur óværu sem kemur sér fyrir í tölvu viðkomandi.

Fighting Ursa er vel þekktur tölvuþrjótahópur sem gengur einnig undir nöfnunum APT28, Fancy Bear og Sofacy.

Palo Alto segir að hópurinn starfi á vegum rússnesku leyniþjónustunnar og virðist hafa notað Audi trixið síðan í mars á þessu ári.