Franska kvikmyndastjarnan Alain Delon er látinn, 88 ára að aldri. Börn leikarans sendu frá sér tilkynningu um andlát hans í morgun. „Hann kvaddi friðsællega í húsi sínu í Douchy, umvafinn þremur börnum sínum og fjölskyldu sinni,“ segir í tilkynningunni (Metro).
Alain Delon varð einn af þekktustu leikurum Evrópu á sjöunda áratug síðustu aldar. Meðal frægra kvikmynda sem hann lék í voru Monsier Klein og Plein Soleil (Purple Noon). Alain Delon var þátttakandi í gullöld franskrar kvikmyndagerðar um og upp úr 1960, þar sem frægir leikstjórar á borð við Jean-Luc Godard og Louis Malle létu að sér kveða.
Þrátt fyrir heimsfrægð fyrir leik sinn í evrópskum myndum tókst honum aldrei almennilega að slá í gegn í Hollywood.
Alain Delon átti í mörgum ástarsamböndum yfir ævi sína og lætur eftir sig fjögur börn sem hann átti hvert með sinni konunni.
Alain Delon var utan sviðsljóss fjölmiðla síðustu árin en hann glímdi við vanheilsu eftir hjartaáfall árið 2019.