Mbl.is greinir frá því að aðstoðarmaður Dags B. Eggertssonar hafi fengið greiddar sex milljónir vegna ótekins orlofs og biðlauna þegar hann lét af embætti í janúar. Þessi starfsmaður hafði sinnt starfi aðstoðarmanns í 12 mánuði.
Aðstoðarmaðurinn, Dilja Ragnarsdóttir, hóf störf í janúar 2023 og lá við ráðningu hennar fyrir að Dagur væri að láta af embætti ári síðar. Hún gegndi starfinu því í 12 mánuði og naut hún biðlauna í þrjá mánuði sem námu ásamt launatengdum gjöldum tæpum sex milljónum. Hún fékk þá greiddar 1.574 þúsund út af óuppgerðu orlofi.
Einar Þorsteinsson, borgarstjóri, ræddi málið við Spursmál þar sem hann var spurður hvort það væri eðlilegt að leysa út starfsmenn með sex milljóna eingreiðslu eftir 12 mánuði.
„Ef að framkvæmdin er samkvæmt reglum og lögum þá er ekki tækifæri fyrir mig til að stíga inn í það,“ sagði Einar og benti á að hann sé nú búinn að vera borgarstjóri í sjö mánuði og líklega hafi borgarbúar meiri áhuga á að heyra hann svara erfiðum spurningum um hans störf, frekar en að spyrja hann um störf fyrrverandi borgarstjóra. „Dagur B. Eggertsson er ekki lengur borgarstjóri“.
Stefán Einar Stefánsson, blaðamaður, leyfði Einari þó ekki að komast auðveldlega undan svarinu. Nú sé hann borgarstjóri og staða borgarsjóðs ekki sú besta. Því sé eðlilegt að borgarbúar velti fyrir sér uppgjöri við fyrrverandi borgarstjóra og aðstoðarmann hans og hvort aðrir starfsmenn megi búast við sambærilegu uppgjöri þegar þeir láta af störfum.
„Ég ætla ekkert að sitja hér og setja mig í þá stöðu að vera að verja framkvæmd sem ég fékk aldrei inn á borð til mín. Borgarstjóri er ekki í einhverjum orlofsútreikningum fyrir alla starfsmenn borgarinnar það er ekki hans hlutverk…“
Stefán gekk enn eftir svari og sagði Einar þá loks að hann hafi fengið upplýsingar frá mannauðssviði um þetta uppgjör og geri enga athugasemdir við það.
„Get ekki séð að þetta hafi farið á skjön við þá framkvæmd sem að almennt er viðhöfð og byggir á kjarasamingsbundnum réttindum. Upphæðin er há, borgarstjóri er á háum launum, það er mikið frí sem er tekið. Auðvitað lítur þetta ekki vel út. 10 milljónir? Það er há upphæð.“