Erlendur ferðamaður segir farir sínar ekki sléttar af akstri á hringveginum í gær. Miðað við lýsingarnar virðist naumlega hafa tekist að forða því að mjög alvarlegt slys yrði vegna gáleysis annars ökumanns, sem ekki er ólíklegt að hafi einnig verið ferðamaður.
Ferðamaðurinn greinir frá málinu í nafnlausri færslu á spjallþræðinum VisitingIceland á samfélagsmiðlinum Reddit. Viðkomandi segist hafa verið að aka eftir hringveginum í bíl ásamt fleiri aðilum, nefnir ekki nákvæma staðsetningu en segir þó að leiðin hafi legið í vesturátt. Ferðamaðurinn segir svo frá:
„Við vorum á leiðinni í vestur. Einhverjir sem voru á bíl á leið í austur höfðu að nokkru leyti ekið út í kant. Um leið og við ókum framhjá þeim opnuðu þau dyr á bílnum og sköguðu þær út í umferðina. Annar bíll sem var líka á leið í austur var á leið fram úr þeim en þegar ökumaður hans sá opnu hurðina sveigði hann snögglega yfir á okkar akrein. Við þurftum þá að sveigja frá til að forðast árekstur og lentum næstum því út af veginum.“
Eins og áður segir nefnir ferðamaðurinn ekki nákvæma staðsetningu en miðað við lýsingarnar virðist þetta hafa átt sér stað í þó nokkurri hæð:
„Það er engin vegöxl þarna til að tala um og þó nokkurt fall. Það hefði áreiðanlega eyðilagt daginn okkar.“
Ferðamaðurinn segir að hefði þeim ekki tekist að víkja sér undan bílnum sem stefndi beint á þau hefði orðið harður árekstur þar sem bílarnir hefðu samtals verið á yfir 160 kílómetra hraða á klukkustund.
Ljóst er þó miðað við lýsingarnar að allt byrjaði þetta með ferðamönnunum sem opnuðu dyrnar á bifreið sinni svo gáleysislega að þær stóðu opnar út á miðjan veg. Ferðamaðurinn sem skrifar frásögnina endar að lokum á því að ræða um það sem hann telur vera líklega ástæðu fyrir þessu athæfi:
„Áður en þú ekur út í vegkant spurðu sjálfan þig hvort Instagram-síðan þín sé þess virði að drepa einhvern fyrir hana.“
