Heimildarmyndin MISSION TO BURNLEY kemur út von bráðar hjá Sky Sports en myndavélar þeirra fengu að fylgjast með síðasta tímabili Burnley í ensku úrvalsdeildinni.
Burnley féll úr deildinni en fyrrum þjálfari liðsins Vincent Kompany fer með stórt hlutverk í myndinni. Búið er að birta atriði sem kom upp á æfingasvæði liðsins.
Þar trylltist Kompany út í Jóhann Berg Guðmundsson kantmann liðsins en atvikið átti sér stað á seinni hluta síðasta tímabils þegar Burnley var í vondum málum.
Kompany var verulega ósáttur með framkomu Jóhanns á æfingasvæðinu. „Jói ekki dirfast til að pirra mig. Ég hef fengið nóg af helvítis tuðinu,“ segir Kompany við Jóhann í byrjun og byrjar að öskra.
📢MISSION TO BURNLEY S2 SPOLIER 📢
What is your thoughts on the Kompany v Guðmundsson scene? #burnley #burnleyfc #twitterclarets🤯 pic.twitter.com/Sv2hFpJWCY
— Burnley FC Clips (@BurnleyFC_clips) August 11, 2024
Kompany hélt svo áfram. Ert þú stór strákur, vilt þú komast í byrjunarliðið? Ert þú stór strákur,“ sagði Kompany sem er hættur með Burnley og tekinn við FC Bayern.
Jóhann lætur öskrin yfir sig ganga en fær nóg þegar Kompany heldur áfram. „Ég bað bara um að klára þennan hluta af æfingunni, yfir hverju hef ég kvartað í dag?,“ segir Jóhann.
Liðsfélagar hans mæta svo á svæðið og draga hann í burtu en Kompany heldur áfram að góla út í loftið og les yfir Jóhanni.
Netverjar ræða atvikið og saka sumir stjórann um eineltistilburði. „Að niðurlægja einhvern svona fyrir framan alla? Ömurlegt,“ skrifar einn.
„Klassísk hegðun hjá eineltisseggi, öll þau ár sem ég hef fylgst með Jóhanni þá get ég aldrei sagt að líkamstjáning hans hafi verið slæm eða viðhorf,“ skrifar annar.
„Þvílíkur rasshaus, frábært að hann sé farinn,“ skrifar einn og fleiri taka í þennan sama streng.
