Andy Woodman segist vera hugrakkur maður fyrir ákvörðun sem hann ákvað að taka fyrir um þremur árum síðan.
Woodman er 52 ára gamall Englendingur en hann var markvörður á sínum tíma og spilaði með liðum eins og Crystal Palace, Exeter, Northampton og Brentford.
Eftir að ferli hans lauk 2006 ákvað hann að gerast markmannsþjálfari og starfaði fyrir Arsenal í dágóðan tíma, undir stjórn manna eins og Arsene Wenger, Unai Emery og Mikel Arteta.
Woodman ákvað þó að segja skilið við stórkostlegar aðstæður í London og tók við utandeildarliði Bromley þar sem hann hefur verið undanfarin þrjú ár.
,,Þegar ég ákvað að yfirgefa ensku úrvalsdeildina fyrir utandeildina.. Viðbrögðin sem ég fékk frá eiginkonunni voru hrollvekjandi,“ sagði Woodman.
,,Ég var að vinna draumavinnuna hjá Arsenal, ég hafði séð um alla markmannsþjálfun í fimm ár fyrir það þá vann ég með Alan Pardew.“
,,Þetta tækifæri gafst og eftir að hafa rætt við eiganda félagsins þá allt í einu virtist þetta vera rétt skref. Ég var hugrakkur að taka þetta stökk.“
,,Ég var í öruggu starfi en fann að þetta væri eitthvað sem ég þyrfti að reyna annars hefði ég ofhugsað hvað hefði mögulega getað gerst.“