Þetta er raunveruleikinn í Taívan í dag en í síðustu viku var fyrsta kitla nýrrar þáttaraðar opinberuð. Um 10 þætti er að ræða sem fjalla um innrás Kínverja í eyríkið. Heimsbyggðin hefur vaxandi áhyggjur af að Kínverjar muni ráðast á Taívan og margir hafa velt fyrir sér hvernig slík innrás muni líta út. Það er einmitt umfjöllunarefni þáttaraðarinnar en kitlan er sögð „mjög raunveruleg“.
Kínverski kommúnistaflokkurinn telur Taívan vera óaðskiljanlega hluta af Kína og hefur lengi viljað koma eyríkinu undir kínverska stjórn. En Taívanar hafa engan áhuga á að fórna lýðræðinu sínu til að lenda undir ægivaldi og kúgun kínverska kommúnistaflokksins.
Kínverskir ráðamenn hafa orðið sífellt herskárri í orðum á síðustu árum varðandi Taívan og telja margir það aðeins tímaspursmál hvenær þeir ráðast á Taívan. Taívan varð til sem sjálfstætt ríki þegar kommúnistar sigruðu þjóðernissinna í borgarastyrjöldinni þar í landi 1949. Þjóðernissinnar héldu þá yfir til Taívan og stofnuðu sjálfstætt ríki sem var raunar einræðisríki áratugum saman en á endanum var lýðræði komið á.
Nýja þáttaröðin heitir „Zero Day“ og er að sögn sérfræðinga óhugnanlega raunveruleg.
Taívönsk stjórnvöld fjármögnuðu gerð myndarinnar að hluta og einn þekktasti kaupsýslumaður landsins lagði einnig sitt af mörkum en hann hefur lengi þrýst á um auknar varnir eyríkisins.
Í þáttunum sjást Kínverjar loka Taívansundi undir því yfirskini að þeir séu að leita að kínverskri farþegaflugvél sem hrapaði þar. Skyndilega ríkir mikil ringulreið á Taívan. Bankar loka, múgur lætur greipar sópa um verslanir. Forsetinn ávarpar landsmenn og reynir að róa þá en Kínverjar hakka sig inn í ávarpið.
Höfuðborgin Taipei breytist í draugaborg, sumir flýja hana en aðrir verða eftir til að verjast. Um leið hafa kínverskir njósnarar laumað sér inn í taívanskt samfélag.
