Fjárhagsvandræði liða í Bestu deild karla virðist nokkur, lið eiga í vandræðum með að standa við gerða samninga.
433.is hefur undanfarna daga fengið margar ábendingar þess efnis. Fjallað var um málefni Fylkis fyrr í vikunni og viðurkenndi félagið að samið hefði verið um leikmenn um að fresta greiðslum.
Fylkir er ekki eitt í þessum báti og hefur 433.is fengið staðfestingu um félag sem skuldar leikmönnum allt að þrjá mánuði í laun.
„Ég get því miður ekki tjáð mig um þetta. Þetta er þó ekki ástæða þess að ég er ekki að spila núna,“ segir leikmaður sem spilar fyrir lið í efri hluta Bestu deildarinnar. Hjá félaginu eru leikmenn sem ekki hafa fengið launin sín síðustu vikur og mánuði samkvæmt heimildum 433.is.
Fleiri lið eru í sömu stöðu að eiga í miklum vandræðum með að ná endum saman.
Í ársreikningum knattspyrnudeilda á síðasta ári kom vel í ljós hversu erfiður reksturinn er í raun og veru á mörgum stöðum. Nokkur félög standa vel og greiða alltaf á réttum tíma en mörg félög eiga í vandræðum.
Þá hefur verðbólga og slíkt í þjóðfélaginu áhrif á rekstur íþróttafélaga, styrktarsamningar við fyrirtæki skila sér ekki alltaf á réttum tíma sem býr til keðjuverkandi áhrif í rekstrinum. Telur einn aðili sem 433.is þetta eina af ástæðum þess að laun leikmanna skili sér ekki alltaf á réttum tíma þetta sumarið.