Bjartmar Leósson hefur öðlast landsfrægð og raunar frægð út fyrir landsteinana vegna þrotlausrar vinnu sinnar við að endurheimta reiðhjól og önnur verðmæti sem hefur verið stolið. Fyrir þetta hefur hann hlotið viðurnefnið hjólahvíslarinn. Ljóst er að verðmæti þeirra muna sem Bjartmar hefur endurheimt er töluvert og hafa ýmsir aðilar verðlaunað hann fyrir þetta óeigingjarna starf hans með til að mynda fundarlaunum. Bjartmar sagði frá því á Facebook fyrr í dag að meðal þessara aðila sé tryggingafélagið VÍS sem hafi einfaldlega fellt niður skuld sem Bjartmar var kominn í við fyrirtækið vegna tæknilegra vandræða með millifærslur af reikningi hjólahvíslarans. Bjartmar segir svo frá:
„Fyrir nokkrum árum fann hjólahvíslarinn sig í þeirri bagalegu stöðu að skulda VÍS 240.000 krónur. Alltaf bara tekið sjálfkrafa af reikningnum í mörg ár, þurfti aldrei að fylgjast með þessu. En einhverveginn fór það út af sporinu án þess ég tæki eftir því. Þegar ég kom að máli við þá um þetta þá felldu þeir niður skuldina! Hef líklega sparað þeim þessa fjárhæð margfalt með því starfi sem ég hef verið að vinna. Kom mér aldrei að því að þakka þeim fyrir opinberlega, því ég skammaðist mín svo mikið fyrir að hafa komist í þessa stöðu. En betra er seint en aldrei…
Takk kærlega fyrir mig!“
