Atvikið átt sér stað þann 4. júlí síðastliðinn en lögreglumenn höfðu afskipti af feðgunum þar sem þeir gengu um götur bæjarins rétt fyrir klukkan sex að morgni.
ABC fékk afrit úr búkmyndavél lögreglumanna og á upptökunni heyrist lögreglumaðurinn segja að honum finnist grunsamlegt að fullorðinn maður sé á gangi úti með barni svona snemma dags. „Er grunsamlegt að fara í göngutúr,“ spurði faðirinn, John Saxton, í kjölfarið.
Lögregluþjónninn svaraði að bragði að það væri tæknilega ekkert grunsamlegt, en það vekti grunsemdir hversu snemma þeir væru úti. „Það er það sem við gerum flesta daga,“ svaraði Saxton.
Lögregluþjónninn bað hann svo að sýna sér persónuskilríki en Saxton sagðist ekki vera með þau á sér. Ekki leið á löngu þar til allt fór úr böndunum og Saxton var skellt nokkuð harkalega í götuna og handjárnaður.
Sex ára sonur Saxton sem er greindur með einhverfu heyrist á upptökunni gráta á meðan hann fylgist með aðförum lögreglu.
Saxton var færður á lögreglustöð en sleppt þegar lögregla gat staðfest að hann væri í raun og veru faðir drengsins og hefði ekki gert neitt rangt. Hann segir að atvikið hafi skilið eftir sig stórt ör á sálartetri sonar hans.
„Hann hefur verið í löggubúningi á síðustu tveimur hrekkjavökuhátíðum og hann hefur talað um að hann vilji vera lögregluþjónn þegar hann verður stór. En núna er hann logandi hræddur við lögregluna,“ segir hann.
Sjálfstæð eftirlitsnefnd með störfum lögreglu er með málið til rannsóknar og verður meðal annars skoðað hvort lögregla hafi beitt of mikilli hörku við handtöku föðurins. Lögregluþjónarnir tveir sem stöðvuðu för þeirra feðga eru enn við störf og hafa ekki verið sendir í leyfi á meðan rannsókn fer fram.
Í frétt New York Post kemur fram að kvörtunum frá almenningi hafi rignt yfir lögregluembættið í Watonga eftir að myndefnið úr búkmyndavélinni kom fyrir sjónir almennings.
