Það er ansi líklegt að miðjumaðurinn Weston McKennie eigi enga framtíð fyrir sér hjá liði Juventus í efstu deild ítalska fótboltans.
McKennie er bandarískur landsliðsmaður en hann spilaði 38 leiki fyrir Juventus í vetur án þess að skora mark.
Þessi 25 ára gamli leikmaður spilaði með Leeds á Englandi 2022-2023 en stóðst alls ekki væntingar eftir komu á lánssamningi.
Juventus var opið fyrir því að framlengja samning McKennie sem er við það að renna út og bauð honum framlengingu sem hann hafnaði um leið.
Ítalska félagið hefur svarað fyrir sig og er ekki lengur hægt að kaupa treyju Juventus með nafni McKennie á bakhliðinni á heimasíðu liðsins.
Gazzetta dello Sport fullyrðir þessar fregnir en McKennie er orðaður við bæði Fiorentina og Aston Villa eftir fína frammistöðu í vetur.