Mikael Nikulásson var rekinn úr starfi sem þjálfari KFA um helgina, hann segir uppsögnina hafa komið gríðarlega á óvart.
KFA leikur í 2. deild karla og er einu stigi frá því að koma upp en Mikael var rekinn og Eggert Gunnþór Jónsson aðstoðarmaður hans tekur við liðinu.
Mikael segir stjórn KFA gera lítið og það hafi oft pirrað hann. „Það vita svo sem allir að ég er ekki búinn að vera sáttur með umgjörð liðsins og hvernig er staðið að þessu. Þegar þetta kemur upp þá líður eins og það sé verið að reka mig úr stjórn félagsins frekar en þjálfara. Ég gerði allt þarna, ég er ekki að setja mig á háan hest,“ segir Mikael í hlaðvarpinu Þungavigtin.
Mikael minnist á það að hann hafi þurft að fá vin sinn Ríkharð Óskar Guðnason til að vera með sér á hliðarlínunni gegn Víkingi Ólafsvík fyrir um tveimur vikum. Enginn frá KFA kom með liðinu í leikinn.
„Hvernig staðið var að þeim leik, í risaleik um annað sætið og búið að ferðast rosalega mikið á öllu tímabilinu. Alltaf mættu strákarnir í liðinu, aldrei neitt væl. Þetta eru endalaus ferðalög og þetta fær maður í andlitið, áhuginn var enginn. Ég hélt mínu striki. Við töpum þeim leik, 50/50 leikur sem gat farið hvernig sem er. Við förum í Selfoss, þar erum við miklu betri en sóknarlega erum við ekki góðir. Þeir vinna með skoti af 35 metrum.“
Mikael er svo rekinn þegar KFA hefur tapað þremur leikjum í röð. „Svo er það Sandgerðis leikurinn þar sem við erum ekki góðir, þeir unnu okkur. Maður er pirraður eftir þannig leik og lætur eitthvað flakka, málin voru ekkert rædd. Það var ekkert samkomulag okkar á milli, ég er ekki mættur til að ljúga en ég var bara látinn fara. Það eru engar ástæður, menn í stjórn KFA sem eru félagar mínir. Þeir telja að liðið eigi að vera nógu gott til að rúlla yfir deildina.“
„Það liggur eitthvað annað að baki, ég myndi segja það ef ég vissi það. Ég veit ekki hvað hefur gengið á,“ segir Mikael.