Meghan hertogaynja af Sussex, eiginkona Harry Bretaprins, hefur mikið verið á milli tannanna á fólki í Bretlandi og þótt víðar væri leitað undanfarin ár. Ekkert lát virðist vera á því en breskir fjölmiðlar hafa greint frá máli reynds lögreglumanns sem hefur verið sagt upp störfum en hann réðst á tvær konur eftir að rifrildi um hertogaynjuna fór algjörlega úr böndunum.
Maðurinn heitir Tola Munro og gegndi stöðu „Inspector,“ sem er lægst setta yfirmannsstaðan í tignarröð bresku lögreglunnar. Munro var staðsettur í borginni Bristol og starfaði í lögreglunni í Avon og Somerset héraði sem er í suðvesturhluta Englands.
Munro er dökkur á hörund og er fyrrverandi formaður landsamtaka svartra lögreglumanna.
Í umfjöllun Daily Mail kemur fram að Munro hafi verið á frívakt þegar hann reifst við konurnar um hertogaynjuna og hafi algjörlega misst stjórn á sér. Tunro sem er fjögurra barna faðir mun hafa togað aðra konuna niður í jörðina og kýlt hana í andlitið og í kjölfarið slegið hina konuna.
Munro fullyrti að um sjálfsvörn hafi verið að ræða en óháð rannsóknarnefnd tók það ekki trúanlegt og sagði hegðun Munro skelfilega kaldhæðnislega í ljósi þess að að á sínum starfsferli hafi hann beitt sér sérstaklega gegn kynbundnu ofbeldi.
Auk þess að missa starfið verður Munro settur á sérstakan lista yfir þá sem bannað er að starfa sem lögreglumenn.
Rifrildið varð að sögn fljótlega afar persónulegt en nefndin segir að Munro hafi ekki átt að láta ögra sér og að ofbeldið sem hann hafi beitt konurnar hafi sannarlega verið viljaverk.
Atvikið átti sér stað í maí á síðasta ári. Það var til rannsóknar hjá lögreglu sem vísaði málinu til embættis ríkissaksóknara sem felldi málið niður á þeim grundvelli að það þætti ekki líklegt til sakfellingar, miðað við þau sönnunargögn sem voru til staðar.
Rannsókn á hvort grundvöllur væri fyrir því að segja Munro upp störfum var hins vegar óháð sakamálarannsókninni.
Niðurstaðan var sú að hegðun Munro sem lögreglumanns, þótt hann hafi verið á frívakt, hafi verið svo ámælisverð að víkja bæri honum frá störfum.
Sönnunarbyrði í slíkum málum er ekki jafn mikil og í sakamálum.
Yfirlögregluþjónn hjá lögregluembættinu sem Munro starfaði hjá segir að ekkert pláss sé í lögreglunni fyrir fólk sem ráðist á almenna borgara, hvort sem viðkomandi hafi verið á frívakt eða ekki. Hann segir að hegðun Munro hafi grafið undan miklu starfi lögreglunnar undanfarin ár við að takast á við kynbundið ofbeldi. Hann segist vona að mál Munro sýni almenningi að lögreglan taki hart á slíkri hegðun í sínum röðum og hiki ekki við að losa sig við lögreglumenn sem hagi sér með þessum hætti.
