Eftir að hafa auglýst eftir sæðisgjafa á Internetinu hittu tvær konur karlmann, sem svaraði auglýsingunni, á bar einum. Þau höfðu sammælst um að notast við sæðisgjöf þar sem hann léti konunum sæði í té í sýnatökuglasi og að þær sæju sjálfar um að koma því á réttan stað í von um þungun. En þetta endaði síðar með því að maðurinn stundaði kynlíf með annarri konunni, án þess að hin vissi um það.

Sky News skýrir frá þessu og segir að konan, sem stundaði ekki kynlíf með manninum, hafi nýlega tapað máli fyrir breskum áfrýjunarrétti tengt þessu. Hún var ósátt við að nafn hennar var fjarlægt af fæðingarvottorði barnsins eftir að upp komst að hin konan, sem er nú fyrrum eiginkona hennar, hafi stundað kynlíf með sæðisgjafanum.

Málið snerist um hverjir séu foreldrar barnsins, sem er nú sex ára, í ljósi þessa „óformlega samkomulags um getnað“ á milli tveggja kvenna og karlmanns.

Eftir að konurnar höfðu tvisvar fengið sæði hjá manninum, án þess að þeim tækist að frjóvga egg með því, hafði önnur þeirra, sú sem ætlaði að ganga með barnið, samband við manninn og bað hann um frekari stuðning.

Í kjölfarið stunduðu þau kynlíf þrisvar sinnum heima hjá foreldrum hennar, án þess að eiginkona hennar vissi af því. Þriðja skiptið var fyrir tilviljun á sama tíma og sæði var dælt inn í konuna með sprautu.

Barnið varð til en í niðurstöðu dómstólsins segir að það sé útilokað að skera úr um hvort barnið hafi orðið til við „tæknifrjóvgunina“ eða við hefðbundnar samfarir.

Konurnar skildu síðar vegna ósættis um uppeldi barnsins. Í kjölfar skilnaðarins skýrði sú sem gekk með barnið frá því að hún hefði stundað kynlíf með föður þess og skilaði inn yfirlýsingu til yfirvalda um að hann sé faðir barnsins. Í kjölfarið var nafn hinnar konunnar fjarlægt af fæðingarvottorði barnsins.

Óumdeilt er að maðurinn sé faðir barnsins en ekki er vitað hvort það varð til við samfarir eða „tæknifrjóvgun“.

Dómurinn ákvað að konurnar tvær og maðurinn séu forráðamenn barnsins og beri sameiginlega ábyrgð á því.