Hvalfriðunarsinninn kanadíski Paul Watson, sem handtekinn var í Grænlandi á dögunum, segist ekki sjá eftir neinu. Franskir þingmenn og Evrópuþingmenn hafa þrýst á forsætisráðherra Danmerkur að fallast ekki á framsal hans til Japan, sem fór fram á handtökuskipunina.
Watson var handtekinn á grundvelli alþjóðlegrar handtökuskipunar þann 21. júlí síðastliðinn. Japanir saka hann um að hafa farið um borð í hvalveiðiskipið Shonan Maru 2 í Suður Kyrrahafi í febrúar árið 2010 og ráðist á skipverja. Það eftir að bátur Watsons hafi eyðilagst í árekstri við hvalveiðiskipið.
Samkvæmt japönskum hegningarlögum gæti Watson átt yfir höfði sér allt að 15 ára fangelsisdóm og sekt upp á 500 þúsund jen, eða 450 þúsund krónur, verði hann fundinn sekur.
Hinn 73 ára Watson var handtekinn á leið sinni frá Írlandi til Norður Kyrrahafs þar sem hann ætlaði að mæta hinu glænýja japanska hvalveiðiskipi Kangei maru. Streittist hann ekki á móti handtöku. Watson hefur verið úrskurðaður í þriggja vikna gæsluvarðhald í Grænlandi og verði hann ekki framseldur má búast við því að honum verði sleppt þann 15. ágúst næstkomandi.
Mikill þrýstingur er á Mette Fredriksen, forsætisráðherra Danmerkur, að fallast ekki á framsalsbeiðni Japana á Paul Watson en Danir sjá um utanríkismál Grænlendinga. Meðal annars hefur Emmanuel Macron Frakklandsforseti beitt sér í málinu og beðið Fredriksen að fallast ekki á framsalið. En Watson hefur verið búsettur í Frakklandi undanfarin ár.
Þá hafa 68 franskir þingmenn og þingmenn á Evrópuþinginu sent Fredriksen bréf til að þrýsta á um lausn Watson. Þá eru tveir undirskriftalistar komnir af stað til stuðnings þess að Watson verði sleppt. 670 þúsund manns hafa skrifað undir annan þeirra.
„Ég er að fara úr fangelsinu. Paul er kátur,“ sagði Lamaya Essemlali, samstarfskona hans, eftir að hafa heimsótt hann í fangelsið í Nuuk á mánudag. „Hann var djúpt snortinn vegna alls stuðningsins sem hann hefur fengið að utan um lausn hans. Sérstaklega vegna undirskriftasöfnunarinnar og stuðnings Emmanuel Macron. Hann veit að ef hann verður framseldur til Japan mun hann aldrei snúa til baka, en hann er ekki hræddur. Hann sér ekki eftir neinu.“
Sagði Lamaya að hún myndi heimsækja hann á hverjum degi í fangelsið. Hún þakkaði fyrir stuðninginn. Paul væri ekki einn í klefanum, með honum væru þúsundir.
