Þetta segir sjónvarpsmaðurinn Egill Helgason á Facebook-síðu sinni og hrósar þar fyrrnefndum Inga Þór sem slegið hefur í gegn með líflegum lýsingum sínum af sundkeppni Ólympíuleikanna sem sýndir eru á RÚV.
Ingi Þór lýsti til dæmis sundkeppninni í morgun þar sem Snæfríður Sól Jórunnardóttir og Anton Sveinn McKee kepptu. Snæfríður missti af sæti í undanúrslitum í 100 metra skriðsundi en Anton komst í undanúrslit í 200 metra bringusundi. Lýsti Ingi sundinu af mikilli innlifun.
Margir taka undir með Agli ef marka má athugasemdir við færslu hans.
„Sammála. Hann gerir þetta skemmtilega,“ segir einn. „Algjörlega sammála,“ segir annar og meira að segja fyrrverandi borgarstjóri, Dagur B. Eggertsson, leggur orð í belg og segir að Ingi Þór sé toppmaður. Einn segir svo að Ingi minni á annan kunnan lýsanda.
„Sammála! Hann er Sigurbjörn sundsins,“ segir viðkomandi og vísar í hinn þrælskemmtilega Sigurbjörn Árna Arngrímsson sem er þekktur fyrir snilldarlegar lýsingar sínar á frjálsum íþróttum.
Færsla sem RÚV birti á X í gærkvöldi:
Ingi er með skýr skilaboð til Antons og þjóðarinnar! „Þið bara vaknið í fyrramálið. Ef þið eruð í vinnunni þá stillið þið á sjónvarpið. Í sundi má öskra! Ég veit að Anton er að horfa á þetta – þú verður að komast í úrslit!“
Anton keppir í 200M bringusundi um 10:50 á morgun 🏊 pic.twitter.com/41gzwjl2CU
— RÚV Íþróttir (@ruvithrottir) July 29, 2024