Brotist var inn í verslunina King Kong í Auðbrekku í Kópavogi í gærkvöld. Þjófurinn braut rúðu í útidyrahurðinni, ruddist inn í verslunina, sópaði vörum af afgreiðsluborðinu og hafði peningakassa verslunarinnar á brott með sér.

„Hann grýtti peningakassanum út um gluggann og þannig náði hann að opna hann,“ segir Jón Þór Ágústsson, eigandi verslunarinnar. Verslunin er opin til 22 á kvöldin og Jón var hissa þegar öryggiskerfið fór í gang vel fyrir miðnætti. „Ég var bara rólegheitunum heima þegar síminn byrjaði að djöflast. Ég hélt að starfsmaður hefði gleymt einhverju á staðnum og óvart sett kerfið í gang, af því það var enn svo snemmt. Ég kíkti á kerfið og akkúrat þá sá ég hann koma inn,“ segir Jón Þór í samtali við DV. Hann dreif sig á vettvang en málið leystist fljótt.

„Ég bý lengst uppi í Mosó og dreif mig á staðinn, keyrði dálítið óvarlega. Þegar ég kom á staðinn var lögreglan komin á undan mér og búin að handataka hann, þeir voru mjög snöggir.“ Þjófurinn náðist í grenndinni og var með peningakassann á sér. Einhverjir tugir þúsunda í reiðufé voru í kassanum.

King Kong í Auðbrekku er önnur af tveimur verslunum sem Jón Þór rekur undir þessu nafni, en hin er á Höfðabakka. Verslanirnar sérhæfa sig í nikótínvörum og óvenjulega miklu úrvali af sælgæti og snakki. Þetta er ekki í fyrsta skipti sem brotist er inn hjá Jóni Þór því brotist var inn í verslunina á Höfðabakka á Þorláksmessu.

„Það er greinilega mikið um innbrot í þessum sjoppubransa, brotist inn korter eftir opnun,“ segir Jón Þór, hress í bragði þrátt fyrir allt, en hann hóf verslunarrekstur á síðasta ári. Verslunina í Auðbrekku opnaði hann í síðasta mánuði.

Myndband úr öryggismyndavél Jóns er hér fyrir neðan.

King Kong innbrot