Tveir af mönnunum sem réðust á íslensku fjölskylduna á Krít fyrr í mánuðinum munu mæta fyrir rétt á morgun. Lögmaður fjölskyldunnar hefur skrifað gríska dómsmálaráðuneytinu bréf til að kvarta undan seinagangi lögreglunnar.
Hinn grísk-kanadíski fjölskyldufaðir og eiginmaður hinnar íslensku Yönu Sönu verður brátt útskrifaður af Venizelio sjúkrahúsinu í Heraklion á Krít, þar sem hann varð fyrir fólskulegri árás miðvikudaginn 17. júlí.
Eins og DV greindi frá réðist fjögurra manna hópur á Emmanuel, Yönu og börn þeirra á bar eftir að einn mannana hafði rekið logandi sígarettustubb í Emmanuel. Öll hlutu þau áverka en Emmanuel langalvarlegustu. Nef og kjálkabrotnaði hann og þurfti að gangast undir aðgerð til að fá súrefni í gegnum hálsinn.
Grískir miðlar greina nú frá því að Emmanuel losni brátt á spítalanum en að hann muni þurfa að koma þangað daglega í einhvern tíma í eftirfylgni eftir aðgerðina. Að sögn lækna mun það taka hann að minnsta kosti eitt ár að jafna sig af áverkunum.
Grísk, kanadísk og íslensk stjórnvöld hafa öll skipt sér af málinu, og margir hafa furðað sig á hvers vegna rannsókn málsins gangi svo hægt. Til að mynda var enginn gerandi handtekinn í málinu þrátt fyrir að borið hefði verið kennsl á tvo þeirra og myndband úr öryggismyndavélakerfi barsins sýndi upphaf átakanna. Hefur lögreglan á Krít legið undir ámæli vegna þessa.
Mennirnir tveir, sem taldir eru vera góðkunningjar lögreglunnar, mæta fyrir rétt á morgun. Samkvæmt miðlinum Protothema hafði bréf sem Manolis Troulis, lögmaður fjölskyldunnar, sendi til dómsmálaráðherra Grikklands mikil áhrif.
Í téðu bréfi fordæmdi lögmaðurinn lögregluna í Heraklion og sagði að hún hefði ekki sýnt neinn vilja eða frumkvæði til þess að bera kennsl á eða handtaka mennina fjóra sem réðust á skjólstæðinga hans.
„Þessi töf á útdeilingu réttlætisins er algjörlega óviðunandi,“ sagði Troulis í bréfinu. „Umbjóðandi minn hefur liðið ólýsanlegar kvalir og fjölskylda hans lifir í ótta. Við krefjumst aðgerða án tafar til þess að fá réttlæti.“
Í viðtali við Protothema varpar Yana, sem er upprunalega frá Úsbekistan en er með íslenskan ríkisborgararétt og var lengi búsett hér, ljósi á hvað árásarmennirnir gerðu við hana.
Yana segir að þeir hafi hrint sér og svo kýlt sig í andlitið. Henni hafi blætt og svimað en á sama tíma hafi hún verið að reyna að komast að því hvað væri að koma fyrir fjölskyldu sína. Hún sá ekki vel hvað var að gerast, aðeins að Emmanuel hefði horfið í hafsjó af „skrímslum.“
„Það eina sem ég gat hugsað um var öryggi fjölskyldu minnar. Hvar er dóttir mín? Hvar eru synir mínir? Hvar er Emmanuel?“ sagði Yana við miðilinn. Öskur barna hennar hafi yfirgnæft allt en enginn gat komið til aðstoðar. Enginn gerði neitt. „Ég gat heyrt í dóttur minni öskra, allt var svo óraunverulegt,“ sagði hún en dóttir hennar er 14 ára gömul.
Sagðist Yana hins vegar hafa séð þegar Emmanuel var laminn í andlitið með stól. Féll hann til jarðar eftir það. Það var versti parturinn. „Hann var meðvitundarlaus en þeir héldu áfram að sparka í hann. Ég var stjörf af hræðslu,“ sagði Yana.
Yana sagði að hver dagur eftir árásina væri barátta. Sólin væri dimm og allur matur bragðlaus, bragðaðist eiginlega eins og eitur. Hún upplifiði lítið annað en sorg og raunveruleikinn væri aftengdur. Sársaukinn og óttinn væru viðvarandi.
„Trúuðu og kristnu fólki er kennt að fyrirgefa þeim sem gera mistök. En þessir árásarmenn eru með vafasama fortíð og eru hættulegir ferðamönnum og heimamönnum. Þeir hæðast að og hrella fólk og koma fólki sífellt í hættu. Þess vegna eiga þeir skilið að fara í fangelsi,“ sagði Yana.
