Á Reddit-síðunni Visiting Iceland birtist í gærkvöldi færsla frá bandarískum ferðamanni sem dvelur hér á landi í tvær vikur. Hann er rúmlega hálfnaður með dvölina og segist þegar hafa ekið hringinn í kringum landið og séð margt af því besta sem landið hefur upp á að bjóða.
„Hvert sem ég horfi er fegurðin alltumlykjandi, hvort sem það eru steinar og klettar úti í náttúrunni, lundar, refir eða allar þessar litríku byggingar sem ég er þakklátur fyrir að hafa fengið að sjá,“ segir ferðamaðurinn sem gagnrýnir landið þó fyrir eitt atriði.
„Það ljótasta hér er allt ruslið. Þegar ég fer út að ganga tek ég alltaf með mér poka sem ég tíni rusl í, enda er ég frá Bandaríkjunum þar sem er alltaf eitthvað rusl til að tína upp – sérstaklega með fram ströndinni. En það kemur mér verulega á óvart hversu mikið rusl ég sé á gönguleiðum og á tjaldsvæðum,“ segir ferðamaðurinn.
Hann segist ekki vilja trúa því að fólk geri þetta viljandi og vonandi sé aðeins um hugsunarleysi að ræða. Segist hann hafa gengið fram á eldhúspappír, flöskur, dósir, snakkpoka og poka með rotnandi matarleifum á þeim tíma sem hann hefur dvalið hér á landi.
„Ég er búinn að dvelja hér í átta daga og er búinn að tína upp mikið rusl. Ég vil biðla til fólks að hugsa um hvar það leggur frá sér hlutina og að passa til dæmis upp á að bréf og rusl fljúgi ekki úr úlpuvasanum,“ segir ferðamaðurinn að lokum.
Færslan hefur vakið talsverða athygli og segjast sumir geta tekið heilshugar undir með ferðamanninum. Einn sem kveðst hafa heimsótt Ísland nýlega, þar á meðal Reykjavík og Vestmannaeyjar, segir að það hafi komið honum og samferðafólki hans á óvart hversu sjaldséðar ruslatunnur voru.
„Það kom oft fyrir að við bárum með okkur ruslið langar leiðir á meðan við leituðum að ruslatunnum. Þetta varð að einskonar gríni þar sem ég bauð tíu ára syni mínum einn dollara í hvert skipti sem hann fann ruslatunnu. Ég endaði þremur dollurum fátækari. En þó að við höfum rekist á fáar ruslatunnur fannst mér Ísland heilt yfir nokkuð hreint og snyrtilegt.“
The ugliest part of iceland
byu/Hodltiltheend inVisitingIceland