Eitt atriði í opnunarhátíð Ólympíuleikanna hefur dregið dilk á eftir sér en um er að ræða innslag þar sem hópur sem samanstóð meðal annars af dragdrottningum og transfólki stillti sér upp svo svipaði til Síðustu kvöldmáltíðarinnar, meistaraverks Leonardo da Vinci.

Mikil reiði blossaði upp meðal trúrækna á samfélagsmiðlum í kjölfar atviksins, og sá skipulagsnefnd Ólympíuleikanna þann kostinn vænstan að biðja allt kristið fólk afsökunar á atriðinu.

Segir í afsökunarbeiðninni að markmið atriðisins hafi verið að vekja athygli á fáránleika ofbeldis milli mannfólksins en sá boðskapur virðist hafa farið fyrir ofan garð og neðan.

Hneykslunargirnin nær til Íslands eins og annarra staða heimsins en Hannes Hólmsteinn Gissurarson, prófessor og einn helsti talsmaður hægri stefnu hérlendis, náði ekki upp í nef sér af hneykslun og velti því upp hver viðbrögð múhameðstrúarfólks hefði orðið:

„Skopstælingin á síðustu kvöldmáltíðinni á Ólympíuleikunum í París var ósmekkleg og raunar óskiljanleg. Hvað gekk stjórnendum til? En auðvelt er að gera sér í hugarlund, hvað hefði gerst, hefði verið reynt að gera gys að þeim minningum um Múhameð spámann, sem múslimum eru kærar,“ skrifaði prófessorinn á Facebook-síðu sína.

Fjölmiðlamaðurinn Egill Helgason, einn helsti samfélagsrýnir landsins, sá sér þá leik á borði að bauna aðeins á Hannes og hægri menn:

„Oft er talað um húmorsleysi og móðgunargirni vinstra „woke“ liðsins. En málið er að liðið utarlega hægra megin er alveg jafn móðgunargjarnt og húmorslaust. Í raun algjör samhverfa – eins og reyndar í fleiri tilvikum. Og satt að segja virðist tíðarandinn sem við lifum í ekki síst einkennast af sífelldu tuði og nöldri – sem á yfirleitt upptök á samfélagsmiðlum en fjölmiðlar gefa svo vængi. Hvílík dómadags leiðindi!,“ skrifar Egill.