Hollenski barnaníðingurinn Steven van den Velde hlaut óblíðar móttökur í París þar sem hann mætti til leiks, ásamt liðsfélaga sínum, til að keppa í strandblaki. Viðureignin fór fram á fallegum velli sem er nánast undir sjálfum Eiffel-turninum. Flestir áhorfendur bauluðu linnulaust á den Velde og voru hinir kátustu þegar hollenska tvíeykið tapaði viðureign sinni gegn ítalska liðinu, 2-1. Hollenskir áhorfendur, sem reyndu að styðja sína menn, máttu sín lítils.

Van Velde brást þó ekki á nokkurn hátt við mótlætinu og einbeitti sér að leiknum.

Ástæðan fyrir óvinsældum hans er sú að árið 2o16 var van Velde dæmdur í fjögurra ára fangelsi fyrir að nauðga 12 ára enskri stúlku. Nauðgunin átti sér stað árið 2014, þegar van Velde var sjálfur 19 ára gamall, en hann ferðaðist frá heimalandi sínu til enska bæjarins Milton Keynes þar sem hann braut á stúlkunni eftir að hafa kynnst henni í gegnum netið.

Flestir töldu að ferill van Velde, sem þá var efnilegur blakspilari, væri á enda en hann hélt æfingum áfram eftir að hafa afplánað aðeins eitt ár af dóminum. Það vakti síðan gríðarlega neikvætt umtal þegar hann var valinn sem fulltrúi Hollands í strandblakinu á leikunum.

Tæplega 100 þúsund manns skrifuðu undir rafrænan undirskriftalista um að van Velde yrði meinað að taka þátt í leikunum en Hollendingar hafa varið sinn mann með kjafti og klóm. Hafa fulltrúar Hollands sagt að engin ógn stafi af van Velde og þvertekið fyrir það að hann þjáist af barnagirnd.

Sjálfur er van Velde hamingjusamlega giftur þýska blakspilaranum og lögreglukonunni Kim Behrens. Hún stendur eins og klettur með eiginmanni sínum en saman á parið unga dóttur.