Jack Grealish, leikmaður Manchester City, er sagður hafa passað sig verulega í sumarfríinu en hann kemur til leiks á nýju tímabili í toppformi.
Grealish hefur haldið sér í frábæru standi í allt sumar en hann fékk ekki að fara með enska landsliðinu á EM í Þýskalandi.
Samkvæmt Mail þá var Grealish varaður við af stjóra sínum, Pep Guardiola, að haga sér í sumar og að koma sterkari til leiks í vetur eftir vonbrigði á síðustu leiktíð.
Grealish hlustaði á þjálfara sinn og tók ummælunum vel en hann hefur verið þekktur fyrir að sleppa sér í sumarfríinu undanfarin ár.
Grealish elskar að fá sér aðeins í glas og kíkja á skemmtistaði en hefur í raun sleppt því alfarið þetta árið.
Vængmaðurinn er ákveðinn í að sanna sig fyrir bæði Englandi og Guardiola á komandi tímabili og vill spila með landsliði sínu á HM 2026.