Sverrir Norland, rithöfundur, bókaútgefandi og sérfræðingur samskipta og sjálfabærni hjá Arion banka segist haldinn ákveðnum flugkvíða, sem felst í því að hann vill alltaf vera kominn tímanlega út á völl. Ástæðuna má að sögn Sverris rekja til atviks fyrir mörgum árum:

„Fyrir mörgum árum var ég í námi úti í London og heimsótti þá vin minn sem var í skiptinámi í Vínarborg. Síðasta kvöldið mitt í Vín ákváðum við að fara út í „einn bjór“ en svo, þegar á hólminn var komið, fannst okkur vissara að hafa þá aðeins fleiri. Í sem stystu máli missti ég af fluginu.

Síðan þá er ég alltaf svolítið á nálum í aðdraganda flugs og vil vera kominn tímanlega út á völl. Í þetta skiptið flýg ég einn frá París (engin börn!) og er með nægt lesefni til að knýja litla eldflaug,“

Segir Sverrir í færslu á Facebook.

„Og ég ákvað svo sannarlega að vera tímanlega á ferðinni. Í dag er opnunarhátíð Ólympíuleikana og fólk hamaðist við að benda mér á að af henni gæti hlotist alls konar rask. Lestarnar gætu lent í rugli. Mýtólógískar verur á borð við dreka kynnu að éta Terminal 1 og af því hlytist augljóslega seinkun.

En svo hefur bara aldrei verið auðveldara að komast út á völl. Ég steig beint inn í RER B-lestina á Gare de nord og var kominn hingað á mettíma, áður en ég náði að klára umfjöllun The New York Times um Ólympíuleikana í París.

Nú sit ég hér aleinn og horfi á flugvélina sem flýgur til Reykjavíkur klukkan 14:00. (Mín fer klukkan 17.) Það liggur við að ég spyrji hvort ég megi fara með fyrri vélinni.

Öll þessi taugaveiklun einungis vegna þess að ég drakk nokkra bjóra úti í Vínarborg fyrir fjórtán árum!“

„Skrifaðu bara nokkrar örsögur á meðan – ekki fá þér bjór/a,“ bendir ein vinkona hans Sverri á.