Hinn 29 ára gamli fjölskyldufaðir, Franklin Zeigler, á yfir höfði sér fangelsisdóm fyrir dýraníð og ýmis önnur brot eftir að hann reif hausinn af máv sem stal frönskum kartöflum af barnungri dóttur hans. Atvikið átti sér stað í New Jersey-fylki en í umfjöllun erlendra miðla segir að Zeigler hafi gjörsamlega tryllst þegar mávurinn stakk sér niður og stal góðgætinu af dóttur hans.
Í bræði sinni þreif Zeigler í mávinn og reif af honum hausinn á meðan skelfdir vegfarendur fylgdust með. Bað hann síðan nærstaddan einstakling um plastpoka svo hann gæti losað sig við hræið.
Laganna verðir voru fljótir á vettvang og hugðust handataka Zeigler sem var ekki á þeim buxunum heldur slóst við þá af öllu afli fyrir framan dóttur sína.
Auk kærunnar vegna dýraníðsins var Ziegler kærður fyrir að streitast á móti handtöku og hlýða ekki fyrirskipunum lögreglu. Verður hann dreginn fyrir dóm þann 9. ágúst næstkomandi.