Lögreglan á höfuðborgarsvæðinu framkvæmdi húsleitir og handtökur á mánudag og þriðjudag vegna rannsóknar á stóru fíkniefnamáli. Þetta staðfestir Grímur Grímsson, yfirlögregluþjónn á rannsóknarsviði lögreglunnar, í samtali við DV.
Segir hann að 16 kg af marijúana hafi fundist í þessum húsleitum en miklu minna af öðrum fíkniefnum, t.d. amfetamíni og ketamíni, undir 1 kg. Ennfremur fundust þrjár milljónir króna í reiðufé í þessum húsleitum.
„Vegna þessa máls eru fimm manns í gæsluvarðhaldi,“ segir Grímur og staðfestir aðpurður að það séu allt karlmenn. DV spurði hvort mennirnir væru með sakaferil að baki og sagði hann: „Já, þeir hafa nú komið við sögu áður.“
Segir Grímur að mennirnir hafi verið úrskurðaðir í vikulangt gæsluvarðhald en þeir voru ýmist handteknir á mánudag eða þriðjudag. Hann vildi ekki svara þeirri spurningu hvort lögreglan hafi verið að fylgjast með mönnunum undanfarið. Hann segir að rannsókn málsins hafi ekki staðið yfir í langan tíma en hún sé mjög langt komin.