RB Leipzig hefur hafnað fyrsta tilboði Barcelona í Dani Olmo. Sky Sports segir frá.
Olmo kom upp í gegnum unglingastarf Barcelona en hefur verið hjá Leipzig síðan 2020. Hann átti flott Evrópumót með spænska landsliðinu, þar sem hann og liðsfélagar hans fóru alla leið og unnu.
Hinn 26 ára gamli Olmo hefur verið orðaður við stórlið í sumar og var Manchester City til að mynda talið hafa áhuga á honum.
Nú hefur Barcelona hins vegar skellt tilboði á borðið. Hljóðaði það upp á allt að 60 milljónir evra en hjá Leipzig voru menn ekki sáttir með greiðslufyrirkomulagið sem spænska félagið lagði til.
Börsungar vildu fá að borga 40 milljónir evra strax, en að restin af upphæðinni yrðu árangurstengdir bónusar.
Tilboðinu var því hafnað og þarf Barcelona að reyna aftur.