Magnús Hlynur Hreiðarsson, fréttamaður á Stöð 2, þurfti að dúsa á sófanum í nótt eftir að hann birti gamla mynd af eiginkonunni á Facebook.

„Skaust í pulló hér á Selfossi áðan og ákvað að fara inn í afgreiðsluna því bílaröðin var svo löng. Þá blasti þessi elska meðal annars við mér í myndaramma en hún vann nokkuð lengi í pylsuvagninum og var mjög, mjög ánægð þar,“ skrifaði Magnús Hlynur á Facebook og birti mynd af eiginkonu sinni, Önnu Margréti Magnúsdóttur, frá því að hún vann í Pylsuvagninum.

Anna Margrét var ekki sátt við eiginmanninn og skrifaði við færsluna: „Takk fyrir ekkert Maggi minn… Sófinn er þinn í nótt.“

Færslan hefur vakið mikla athygli og sló athugasemd Önnu Margrétar sérstaklega í gegn.

Ein sagði: „Þetta var nú skemmtilegur tími Anna mín. Ekki láta svona við hann Magga þinn.“

„Já góður tími…en það hefði nú ekki drepið mig að þarna 20 ára gamla ég hefði ekki lítið út eins og 55 ára!!!! Ég er viss um að þið fáið meira fyrir pylsuvagninn ef þið fjarlægið þessa mynd úr anddyrinu!!!!“ sagði þá Anna Margrét.